தண்டையார் பேட்டை ஏரியாவில் ஸ்பீடு வட்டி, மீட்டர் வட்டிக்கு பணம் வாங்கி வாட்டர்கேன் பிஸினஸில் இறங்கிய ஹீரோ ஜி.வி. பிரகாஷ்., அதில் பெருத்த நஷ்டத்தை சந்தித்த நிலையில் காதல் திருமணத்திற்கு தயாராகிறார்.

மாப்பிள்ளை மீது நம்பிக்கையில்லாத பெண்ணின் பெற்றோர், மாப்பிள்ளைக்கு வேலை கிடைத்ததும் திருமணத்தை வைத்துக் கொள்ளலாம் இப்போதைக்கு நிச்சய தாம்பூலம் மட்டும் போதும் என நம்பிக்கை இல்லாமல் பேச ., மற்றொரு பக்கம் , வாங்கிய கடனை அடைக்க வழி இல்லாமல் ஒரு வீட்டில் திருட போகும் ஜி.வி.பிரகாஷ்., அங்கு சிக்கலில் ,தீவிரவாதிகளின் பிடியில் இருக்கும் மாஜி போலீஸ் ஆபீஸர் சுமனை சிக்கலில் இருந்து தீவிரவாதிகளின் பிடியிலிருந்து மீட்கிறார். அதற்குப் பரிகாரமாக ஜி.வி. பிரகாஷ்க்கு ,சுமன் என்ன செய்கிறார் ? என்பது தான் "வாட்ச்மேன் "படத்தின் கதையும் ,களமும் ஆகும்!

விஜய் இயக்கத்தில் ,அருண்மொழி மாணிக்கம் தயாரிப்பில் ஜி. வி .பிரகாஷ் குமார் , சம்யுக்தாஹெக்டே, ராஜ் அர்ஜுன் ,யோகி பாபு ,சுமன், முனிஸ்காந்த்... உள்ளிட்டோர் நடிக்க , ஜி.வி. பிரகாஷ் குமாரின் இசையில் வெளிவந்திருக்கும் "வாட்ச்மேன்"படத்தில் "இன்று இரவு 10 மணிக்கு., இன்று காலை 9 மணிக்கு..." என்று அவ்வப்போது காட்சிகள் எந்த நேரத்தில் நடக்கிறது? எனும் தகவல் மாறி மாறி வருவது ரசிகனை குழப்பும் வகையில் காட்சிப்படுத்தப்பட்டு இருப்பதும் ,ஒரு கட்டத்திற்கு மேல் கதை சுமனின் வீடு தாண்டி நகராமல் சுற்றி சுற்றி அங்கேயே வருவது மாதிரி காட்சிப்படுத்தப்பட்டிருக்கும் விதமும் ரொம்பவே கடுப்பேற்றுகிறது.

ஜி.வி. பிரகாஷ் வடசென்னை பையனாகவே வர வர மாறிவிட்டார் .திருடப்போன இடத்தில் ஒரு நாயின் உதவியுடன் குண்டடிபட்ட எக்ஸ் போலீஸ் சுமனை காபந்து செய்யும் காட்சிகளில் ஜி.வி நடிக்க முயற்சித்திருக்கிறார். பாராட்டுக்கள் !

அதேநேரம் ,வட்டிக்காரர் முன் முழி பிதுங்கும் இடங்களில் இன்னும் எக்ஸ்பிரஷன்ஸ் தேவைப்படுகிறது ஜி.வி. இசை மாதிரி நடிப்பிற்கு நிறைய ஹோம் ஒர்க் செய்ய வேண்டும்!

படத்தில் கதையின் நாயகி அனிதாவாக வரும் சம்யுக்தா ஹெக்டேவைக் காட்டிலும் படத்தில் ஒரு பாடலுக்கு அதுவும் கிளைமாக்ஸுக்கு பிந்தைய புரமோஷன் பாடலுக்கு ஆடி இருக்கும் சாயிஷாவுக்கு (அதாங்க , நம்ம ஆர்யா வூட்டுக்காரம்மா... ) முக்கியத்துவம் ஜாஸ்தியாக இருந்தது ஏனோ ?!

 தீவிரவாதி ராஜாக வரும் ராஜ் அர்ஜுன் , நாயகரின் காமெடி நண்பர் யோகி பாபு போலீஸ் அதிகாரி சுமன், நாயகரின் அக்கா மாமா முனிஸ்காந்த்... உள்ளிட்டோர் பாத்திரமறிந்து பக்காவாக நடித்திருக்கின்றனர். அதிலும் வட்டி இன்ஸ் ஆக வரும் இப்பட எடிட்டர் ஆண்டனி, அந்த வட்டிக்காரர் சில்வா மாஸ்டர் உள்ளிட்டோர் எக்கச்சக்கமாக நடித்துள்ளனர். இவர்கள் எல்லோரையும் காட்டிலும் அந்த நாய் இயல்பாக நடித்துள்ளது பலே! பலே!

ஆண்டனியின் படத்தொகுப்பு இடைவெளிக்குப் பின் இந்த படத்தில் எடிட்டர் இருந்தாரா? இல்லையா..? எங்கே .? என கேட்க வைக்கிறது ! அவர்தான் படத்தில் வட்டி இன்ஸ்பெக்டர் கேரக்டர் ஏற்றிருந்தார் அதனால் எடிட்டிங்கை மறந்துவிட்டார்...போலும் எனும் அளவில் மொத்த படமும் இழுவையாக இருக்கிறது !